Olmis di Diu - A. Beline

La femine plui viele dal mont, une brasiliane di 124 agns, e à domandât come regâl di viodi il mâr. La television le mostrave cui pîts ta l’aghe come une frute e cul voli interessât e spaurôs che al cjalave domandantsi ce che al podeve jessi “di là”. Parcè che il mâr al fâs gole e pore, al unis e al divît, ti semee di vêlu in man cu la prime zumiele di aghe e tu ti inacuarzis che tu às mancul di nuie.
Nissune marivee che la civiltât e sedi nassude ad ôr e ator dal mâr e che i popui primitîfs a vedin considerade cheste inmense poce plene di divinitâts e di besteatis. Ancje sant Augustin, denant dal mâr di Ostie, cul frutut che al cirive di meti intune busute l’aghe dal mâr, al à capît che nol è nuie ce capî dal misteri di Diu, ma dome di adorâ. O al massim bagnâsi i pîts e svuacarâ ad ôr dal misteri.
Jo o ai simpri pensât che pocjis robis come il mâr a son une parabule, une olme di Diu. Cu lis ondis che a segnin i seconts e lis mareis che a segnin lis zornadis dal orloi infinît dal timp, al è eterne identitât e eterne novitât. Consolant e incuietant, apene che tu ti svissinis ti semee di vêlu in man, ma apene che tu vâs in dentri tu sâs che nol sarà mai to. E come Diu, ancje il mâr al è simpri dongje e simpri lontan, simpri domande e mai rispueste.
Ma il mâr al è ancje parabule de vite dal om e de sô anime. La vite e unis e e divît, e semee simpri compagne e e je diferent, come che e semee diferent ma e je di une identitât sostanziâl. La vite ti semee di cognossile e di dominâle e invezit ti scjampe simpri, cuant che no rive adiriture a savoltâ la tô barcjute cui siei burlaçs trements e imprevedibii. Se i ves di augurâi une biele robe a un amì, i disares di jessi come il mâr, che se ancje parsorevie al è simpri in moviment e afan, in profonditât al cognos simpri la calme.
La lûs dal soreli e rive a inluminâ dome une piçule part e sot e je eterne gnot e misteri, cui mostros marins che ducj sa che a esistin e nissun viôt. Cui rivaraial a cognossi lis profonditâts scuris de storie e i pinsîrs e i desideris e lis poris e lis colpis che a navighin tal subcussient di ognun di nô?
Tal font dal mâr a son platâts tesaurs maraveôs e scheletros spaventôs, come tal font de storie, arcje inesplorade di fats straordenaris di bontât e positivitât ma ancje di violence cence numar e di sanc cence culumie.
Crist, cuant che al voleve che si cjapas tant pes di chel bon, ur à dit ai apuestui di lâ in dentri e in là e difat a àn fate une pescje meraculose. Stant su la rive si pò pescjâ dome scarpis rotis e scjatolam. Bisugne vê il coragjo e la inteligjence di lâ in là e in dentri. Chest al vâl pe cognossince di se stes, des personis ator di nô, de storie, de filosofie, de religjon. Une persone e un popul superficiâi, che no van in profonditât, no pescjin nuie, dome porcariis, e, se a vuelin mangjâ, a scugnaran contentâsi di scjatolam fat no si sa di cui e cun dentri no si sa ce. In ogni câs a pierdaran dut il bon e il biel e il gnûf. O sin za a la culture, a la comunicazion, a lis ideis, ai sintiments preconfezionâts, bolîts e sterilizâts. Nô o podin dome sfogâ la fantasie tal sielzi l’imprest che al vierç la scjatule.
Ma il mâr mi fâs pensâ ancje al puart de eternitât, là che la mê barcjute si sta svissinant dì par dì, fra mil poris e sperancis.
Cuissà se la int di Lignan , fra un gjelato e une scotadure, si rint cont di vê denant di sè tante ricjece di significazions?